Karaj Amikoj,

La lasta numero de la jaro 2008 estas samtempe la unua de la nova kolekto, la 24-a. Ĝi espereble atingos vin antaŭ la Zamenhof-tago ; omaĝe al tiu dato estas sur paĝo 28 artikoleto kiun Jean Amouroux elfosis el sia vasta arkivo.
Post lia OSIEK-premiado, mi proponis al Sergio Pokrovskij kontribui al tiu ĉi LG. Li proponis sian studon pri la difina artikolo, ĉar li “opinias la problemon sufiĉe interesa, kaj samtempe skandale neglektita de la okcidentaj esperantologoj”. La reta versio de lia studo, aperinta en 2007, tuj generis viglan retan debaton inter lingvistoj.
Por ripozigi la cerbon, legu poste la artikolon de Sigurdur Pétursson pri islandanoj kiuj eltrovis Amerikon kvin jarcentojn antaŭ Kolumbo.
Dankon al niaj diligentaj recenzistoj. Eugene de Zilah instigas nin al legado de la ‘Postnikov’ de Bronŝtejn kaj de Tolkien en la traduko de Auld.
Se mi havas tempon informi niajn perantojn, la abonprezo baldaŭ estos 30 €, do reabonu rapide antaŭ ol tiu ĉi bedaŭrinda altigo realiĝu. LG deziras al vi ĉiuj feliĉan novjaron.

Madeleine de ZILAH